Ljetovalište kraj Opatije – tri slova. Ljetovalište kraj Lovrana – tri slova. Pitanje je z križaljki, a odgovor je vavek – Ika. Danas je Ika poznato turističko mesto na kraje Opatije al' na početke Lovrana, ovisi s ke strani prihajate. Živjenje va njoj je mirneje, tiše i lepje po zime, aš po lete pridu gosti i turisti sa seh stran sveta počinut od sakidajnega dela, a ni lepjega nego kupat se, sunčat, plavat, gnjerat, uživat... i doma se vrnut veseleji i srećneji.
Retka su naša primorska mesta ka sede moru va krile. A Ika je baš takova. Kad se mesto širilo, onda su kuću za kućun zgorun zidali tako da jena drugoj ne pači kada ih rano jutro sunce bušne. Mej kućami se delal škalin po škalin, a do njih vrtići, parki, tu i tamo ka lešica za radić, pa j' zgledalo kako da mesto plazi nazgorun se do prveh umejak spod Učki. A morda se samo Učka leno spušćala korak po korak zdolun se dokle ni njijo zelenilo dotaknulo modrinu mora. Mej ten se našla Ika.
Poveda se da Iki nekada ni bilo i da su se prvo va nju doselili domaći judi z Opriča. Oni su se spušćali do mora kad su ribarili. Ale poć hodeć zdolun, pa trudni zgorun i tako saki dan ni bilo lahko. Gubilo se puno vremena na hod, pa su oni sled više kurajni odlučili storit najprvo kakovu baraku, a potle i kuću bliže moru. Bil je to početak rajanja jenega mesta pred ken se otpirala drugačija budućnost.
LIBURNIJSKA BOŽICA IKA
...