SUŠAČKA REVIJA broj 68

 


književnost

DVEN HĆERAN OTAC

Cvjetana Miletić

ŠTORIJA O VIKTORU CARU EMINU

Gren za štorijun. Viktorovun. I to ne za onun od pisanja leh za onun od sakidajnega živjenja. Zato mi se j' vrtet po Opatije i Lovrane, po Kraje i Sveten Antone, kade su se navrezali njigovi prvi dani, dani otroštva, pul noni i nonića svetoantonskega i noni lovranske.

Poć ponazad, va jeno drugo i drugačije vreme, ko j' pisalo i drugačiji spomeni, ni lahko, a nan današnjen ih je i teško razumet. A si su ti dani i leta pustili neki sled. Tapan pomalo za ten sledon kako bin prišla do prveh njigoveh koračić. Otpiraju se pozabjeni štajoni i leta ka će juden od struki rasćarat tu velu jubav za rojeni kraj, ka j' Viktora Cara Emina kunpanjala od rojenja do smrti. Njigovo je srce vinveka bilo i ostalo vezano za more, judi i primorski kamik.


Ema i Viktor Car

Lepo se vrnut više od veka ponazad. Za početak lih pol. Bili smo još deca kad smo šli na izlet do Pazina. Tunela još ni bilo ni na hartah, samo cesta pred nami i pasani put ki je ostajal za nami. I lep letni dan. Stara se kurijera komać gibala. Zvali smo ju tartaruga aš je vozila tako pomalo da smo skoro mogli teć naporedo š njun. Pasali smo Opatiju. Obrnjali se za kupališten Slatina, kega više ni, i naslišali čigovi su se bili veli hoteli i lepi palaci. Pod Učkun kućice bele... zapisal je Gervais. Mi smo to znali napamet, ma nigdere ni bilo ni jene kućice bele. Se sami palaci i bogatija. Da nismo prihajali z Nazorovega grada Kastva, morda ovo ne bi ostalo va mojeh spomeneh.

Onput je prišal Lovran. Pa Kraj. Puzajuć smo prišli na vrh rebri i tu j' kurijera fermala. Komać se dovukla do vrha. Učitelica nan rekla da je va ten meste rojen Viktor Car Emin. Verovali smo. Va Mošćeničku Dragu nismo šli, magar je ono rojeno mestićo materi barba Riketa, Rikarda Katalinića Jeretovega, ki j' napisal oni lepi versi Ki pozna Sipar i žalo, moje carstvo malo...

 Kurijera je hrhnjala daje. Pokazala se i crekvica sv. Mandaleni pul ke j' ofce napasala divojka Jelka. Potle je finila va knjige Jelkin bosiljak, ku j' napisal Eugen Kumičić, brsečki Jenio Sisolski. O njemu smo neš više znali aš su "Začuđeni svatovi" bili va lektire.

Danaska znan: sako mesto imelo je jenega književnika, a saki je bil jena perlica na liburnijsken luštrine. Samo mi mići, mićihni, onputa nismo šli za ten. Trebalo j' ozrenut. Kad me put živjenja otpejal na delo učitelice va Brseč, se mi se to vrnulo i prišlo namisal. A si oni, Kumičić, Emin, Jeretov i Gervais postali su moji. Kot rod rojeni. Ako ne baš rodbina, a ono svojbina al svojina kako bi neki rekli.

 

        VA SPOMENEH JE VREME ZAVAVEK FERMANO

Jedan dan po Opatije me pejal Mario Glogović i pokaževal: Vidiš, ovo je Ulica Viktora Cara Emina. Gre zdolun na more. On je odvavek volel more i Istru, jedino je morda više od tega volel svoju Emu. Va toj ulice ni nikad bival, nego zgora glavne cesti va vile Dalibor. Školu je hodil Lovrane, a bival je pul svoje noni Hamzice. I ni napisal samo Danuncijadu po koj ga najviše štimaju, nego još more tega ča će komać jedan dan dobit pravi valor.

Pul pošti zgorun bila j' oštarija Bršjan. Va nju je shajal Drago Gervais. I on je volel more, Opatiju i si njiji judi, jedino je morda i on više volel svoju Nadu. Va versi je posložil pol ondašnje Opatije. Sad zavavek živeju i nona Marjanka, i Stari mladić, Marija lavanderka i nonić barkajol... I oštarija Bršjan kade se igrala briškula.

Rikard Katalinić Jeretov je z Voloskega. Ćaća mu bil pomorac s Trogira, a mat z Mošćeničke Dragi. Kot i si Vološćani i on je tekal po škalineh do mora, hital udicu i lovil ribi. Kad je bil mladićac, moral je poć ća pa j' svojmu gradu regalal najlepji versi Gradiću moj lepi, spod te Učke gori... Kako je barba Rike mlad ostal bez materi, jubav za Mošćeničku Dragu bila mu je do veka. I danas je na kamik zapisano ono Ki pozna Sipar i žalo... On je bil barba Viktoru Caru i čuda su puti šetali skupa po Lungomare.

O Kumičiću znaš više od mane. Ma neš ne znaš. Da su Kumičića, Cara, Jeretova i Gervaisa - ta četiri naša domaća sina, pjesnika i književnika - zvali "detelina od četire pera".

Se tako ćakulajuć prišli smo va opatijsko Narodno sveučilište. Z jene stalaži znel je jenu belu figuru, danaska bi rekli skulpturu, a bil je to kipić ne veći od trejsetak centimetri. Beli žes je već dobil kolor od let i praha. Na njin su bile četire glavi stavne skupa. Saka je gledala na svoju stran. Figuru se moralo vrtet v rukah za videt ki je ki. Odzgora su zaspraven spodabjali deteline od četire pera, a kad se kipić obrnjalo fišo v oče gledali su vas ovi judi od pera. Bil je to neki predložak za veli spomenik ki ni nikad storen, a Mario mi s prston pokaževal: Ovo je tvoj Kumičić, ovo Viktor Car, ovo barba Rike, a ovo moj Drago Gervais. Kamo je finil taj mići kip potle ča se Sveučilište raspalo? Je zgubjen al zagubjen? Se neki ga se domisle, samo niki niš ne zna. Po užance.

 

        POĆ MI JE DAJE ZA VIKTOROVUN ŠTORIJUN

Pred čuda let povedala mi Silvana Jeličić, rojena Hamsa, da su njiji koreni trdo spleteni s koreni noni Hamzice, pul ke je Viktor bil četire leta, aš je toliko durala i pučka talijanska škola. Domišja se Silvana kako se kot mića školanka štimala ča njoj je Viktor Car rod i ča škola nosi jušto njigovo ime.

Za Silvaninu sestru Adrijanu reču, ako stare sliki ne lažu, da je prava nona Hamzica. Tako je nona Hamzica zasenjala ne samo Viktorovi najraneji dani, nego i dani oveh dveh Lovranki. To me otpejalo na pogovor i z njihun materun Karmen. Ona je po ženidbe postala Hamzica, ma j' dugo va familije naslišala štorije od svojni i fanj zapametila. Dočekala nas širon otprtega srca. I veselo povedela svoju štoriju, ka j' primerena i za Božje uše. Moja mama Pierina Adamo bila j' Lovranka. Oženila se za Buzećana Umberta Flega pa su šli bivat va Sovinjak. (Slučajno al ne Sovinjak je prvo mesto va ken je kot učitel delal i Viktor Car.) Tamo se rodila Laura, pa 1919. ja, onda Nives i Licia. Najmlaja sestra Fides rodila se već Lovrane va Staren grade, kamo smo prišli bivat. Finila san pet let pučke školi i tri leta stručne, se skupa osan let, ma se talijanske. Doma smo govorili domaći. Hrvaski san navadila govorit s televizijun, a čitat z Noven liston. Oženila san se za Vladimira s familije Hamsa, ki je po oce Ninote bil rod Viktoru Caru. Va toj fameje Hamsa imeli su tri sina – Tončića, Vladota i Ninota i hćer Pepinu. Nino je oženil Katinu i imeli su sina Vladimira za kega san se ja oženila 1944. leta. Tako san i ja postala Hamzica. Ova kuća ni bila od Viktorove noni, nego su ju moji svekar i sekrva reditali i va njoj bivamo više od sedandeset let. Domišja se Karmen Hamsa još fanj tega ča se dogajalo va familije, a najviše se, govori, povedalo od maškar i muziki. Kako nekad tako i danas. Pul njih si sopu i kantaju.

Beseda na besedu i put me peja na Bahovu. Va Ville Maria biva Adela Vidas Car, Hreljanka, ka j' bila oženjena za dr. Nila Cara, neputa Viktora Cara Emina.

Nilo Car je va Lovrane dobil najduju ulicu još 1974. leta. To je senjal da su ga Lovranci štimali i za života i potle tega. Žena Adela, ku prijateli i domaći zovu Adica, voli povedat. Voli i pisat. Tako j.' napisala knjigu o svojmu ocu ki j' umrl va logore Landsberg am Lech va Drugen svjetsken rate, a sad ju dopunja i piše knjigu o svojmu mužu.


Nilo Car, nećak Viktora Cara Emina, i njegova kćer Vesna

Za boje razumet kašneju štoriju, treba se reć da j' Viktor imel još dva brata i dve setri. Najstareji Ernesto, rojen 1866. zgubjen je na moren, ne zna se ni kada ni kade. Za njin je ostala hćer Meri (1896. - 1956.), rojena va Port Saide, pokopana va Lovrane. Stareja sestra Ema (1868. - 1943.) isto je pokopana va Lovrane, a bila je oženjena Dujmić. Onda se kot treti rodil Viktor (1870. - 1963.) Pa je prišla mlaja sestra Rikarda (1878. - 1952.). Ona je va šesten lete kot divojčica prebolela meningitis, a bol njoj zela sluh pa j' daje govorila besedi ke je kot otrok navadila i sprotu mešala hrvaski i talijanski. Živela je va Staren grade Lovrane se do smrti. Od oca je reditala miću penziju pa su njoj celo živjenje pomagali brati Viktor i najmlaji Mario. Mario se rodil, rekli bi stari judi, kot poberuh. To je zadnji otrok va familije (1884. - 1965.). On se oženil za  Josephinu Lovretić. Imeli su sina Nila i hćeri Nini, Tatjanu i Vandu. Sad kad smo ih seh prestavili, moremo daje.

Živjenje Maria i Viktora preplelo je čudni puti. Voleli su se od rojenja, a tako su malo let bili skupa. Mario je bil 14 let mlaji, jako vredan i sposoban, danaska bimo rekli da j' bil umešan z dva storit tri. Kad je va Lovrane ozidal Villu Mariu, ponujeno mu delo va Argentine. Mislel je dole ostat ko leto, a ostal je zavavek. Za njin je 1932. leta šla i njigova žena sa se tri mlaje Nilove sestri. Nikad se niki od njih ni vrnul, jedino su nekoliko puti prihajale žena i hćeri, najviše Tatjana, ma samo va posjet barbe Viktoru i Nilu.

Nilo je teh let kad su njigovi šli va Argentinu, va Italije studiral i finjeval medicinu pa j' bilo škoda prekidat studija a tako i tako su misleli se vrnut pa ni šal svojemi preko mora. Otac Mario je va Argentine postal industrijalac, obogatel se i redovito slal šoldi. Pomogal je sestre Rikarde, sinu Nilu i bratu Viktoru, ki je na se prezel ulogu oca. Viktor i Nilo su se sa leta i voleli i štimali... Kad je Nilo finil studij i postal duhtor, odslužil je vojsku, doma prišal 1942. kad je već bil rat i počel delat va rečkoj bolnice. Dr. Zdravko Kučić svetoval mu da gre na Tuhobić i tako je već 3. maja 1943. bil duhtor va partizanskoj bolnice. Kad je 1945. s partizanskun bolnicun prišal na Hreljin, tu mu se zapijažala jena mala. Ta mala bila je Adela Vidas. Još je tugovala za sestrun Ružicun ka j' poginula od dela nemaške granati, a ča je daje bilo Adica poveda ovako: Bila san u crnini. Išla sam na svibanjsku pobožnost kad me Nilo prvi put vidio. Kad san se vraćala iz crkve, Nilo me dočekal i zagrlil, a ja san kot strel pobigla. Imela san samo 15 let. Poslije mi je u pismima nježno predbacivao da sam pobjegla ali da sam se ipak okrenula za njim, što je bila istina. Kad ga je barba Viktor nagovarao da se oženi, on mu je rekao da je našao jednu malu i da će oženiti ili nju ili nijednu. I doista, poslije pet punih godina oženili smo se u Zagrebu 1951., gdje sam završila trgovačku akademiju. Onda smo otišli na Hreljin pa u Lovran i Opatiju, gdje su nam barba Viktor i teta Emica priredili feštu... Na toj večeri barba Viktor nam je ovako čestitao: "Draga naša deca! Povedet ću van jenu štoriju od postol. Prej ženidbi saki oteje novi postoli kupit. Najlepji i ki njin se najviše pijažaju. Ma novi postoli i stišću. Vavek stišću dokle su novi. Pa, dragi moji, zdržite dokle stišću! Aš potle nekega vremena, postoli se rashode. I potle su najboji, najmekji i nećete ih više otet ni dat ni hitit ća!"

Živjenje je šlo naprvo. Nilo je delal kot duhtor va Vojnoj bolnice Beograd,  potle va Pule se do svoje prerane smrti. Adela i Nilo imeli su hćer Vesnu, ka se rodila 1952., i četire leta mlajega sina Dalibora. Oben je barba Viktor dal imena. A da je barba Viktor imel prsti va saken deliće njiha živjenja, videt je i po ten ča j' Nilo svoju Adicu, kako ju va jubave zval, zi Zagreba još kot divojku poslal v Opatiju, da tobože odnese pismo Viktoru i pozdravi barbe. Adela se tega ovako domišja: Sjećam se... moj Bože! Kad me Nilo u Zagrebu zamolio da odnesem pismo "barbe v Opatiju" nisan znala da je to zato da me "pokaže barbe i čuje njegov sud". Iako sam se bojala prvog razgovora s književnikom, kasnije sam shvatila koliko je on dobar i jednostavan čovjek. Volio je mnogo pričati. Važno je bilo samo to da ga netko sluša. Kasnije, kad bi završili naši plesni tanci u hotelu Kvarner, uvijek smo ostali prespavati u Vili Dalibor. Uostalom, barba Viktor je našoj djeci dao imena, Vesni po božici proljeća, a sinu po vili koju je neobično volio.

Jedanput kad je va posjet Viktoru i Eme prišla i Adelina mater s Hreljina, Viktor ju pital da kega j' leta rojena. Kad je čul da j' rojena 1896., barba Viktor reče žene: Čuj Ema, gospa je prema nama pravi pulastrin.

Pred nas je Adela zinesla more pisam. Stotinjak od muža Nila i na desetki Viktoroveh. Neka su pisana pisaćun makinun, neka z rukun. Va ten kupe pisam, ka čekaju neku stručnu dušu, je i jeno Adele posebe drago. Napisal ga Rikard Katalinić Jeretov 1953. leta. Tega leta Adela i Nilo su putovali va Dubrovnik eroplanon, pa brodon do Splita i tamo se javili Rikardu Kataliniću. Ovisti je zajeno napisal Viktoru  pismo i pohvalil se da su ga našli. Pijažala mu se i njiha hćer Vesna pa j' pismo finil z besedami: Mala Vesna - prava pjesma.

 Va ten kupe pisam su i ona ka su svojni njijemu ocu pisali prof. Vjekoslav Spinčić i dr. Ivan Ribar. Kako su h Caru prihajali si živući judi od pera tega vremena, tako su se javjali i Nilu i Adele. Posebe su lepi spomeni na Miroslava Krležu, Marijana Matkovića ki je sokril i onu tabelu va Kraje, onda na Dobrišu Cesarića, Uliksa Štangera, na si Mandići z Voloskega i prof. Ivana Ivančića, ki j' bil glavni kurir zmej Viktora i Nila i kućni prijatel. Posebe veseli ča je Adela spravila čuda fotografij i more spomeni od seh svojeh i Viktoroveh prijateli. Još čuva lončići i vrčići od Viktorove materi, se reditane sliki i umjetnine i regali od barbi Viktora. Se te "sitnice", ke to nisu, va njihen su živjenjen imele poseban valor. Koliko se tega još va pismeh more nać?! Će Adela Car arivat se to stavit na hartu samo Bog zna. Leh bit će vela škoda ako to ne stori.

Poveda mi Adela da je barba Viktor bil jako rečit čovek.

Kad smo prihajali h njin, užali smo ga pitat: "Barba, kako ste?" A on nan je vavek odgovoril: "Kako onisti s Kraja." A "onisti s Kraja" je bil starac, ki j' va nedejno zapolne na joge kibiciral kako boćari igraju i šetal semo - tamo pul joga. Tu bi se našal i mladi Viktor Car, kemu je to bilo vreme počinka i užitka, a tu je zapazil i nekoliko starejeh keh je kašneje pospravil va svoje štorije. Taj stari čovek imel je kamižolin na ken mu je visela kadina od uri i on je smiron pogledeval na nju za videt koliko j' ur. Viktora bi bil saki put pital: "A ki, ki, ki si ti?" Viktor bi mu bil saki put odgovoril: "Ja san Vitor, prinčipesin vnuk." S tun mićun štorijicun otel nan je reć da je star i da pozabjuje. Ma ni bil ni jeno ni drugo. Bil je vremešan i čuda tega je pametil, ča se vidi i po pismeh keh nan je pisal i kad je imel više od devedeset let.

 

Jeno, ko je napisal 1948. leta va drugen mesece na 19. dan, pisano je na makinu.

Dragi Nilo!

Primio sam tvoje milo pismo i vjeruj mi, da me je živo obradovalo. Primi naše iskrene čestitke! I ti si zaslužio u punoj mjeri pohvalu, što ju je Prospero izrekao Arielu: - Thou hast done well, fine Ariel! Teta Ema je ushićena, Tonica ti se divi, a ja, tvoj barba, ponavljam Prosperovu pohvalu: Fine Ariel, thou hast well done! I ponosim se s tobom. I s pravom! Ovih dana pisao sam ti tati, i mada nisam bio sasvim siguran, napomenuo sam mu, da te je domovina obasula najvišim odlikovanjima. Prilažem ti odrezak tog pisma od 21. decembra. Potkrala ti se greška, koja me je natjerala u zabunu. Sad je sve u redu. Od Ninice, za koju smo čuli, da je u Veneciji, nikakva glasa. Ni tata ne piše, ali čujem da su svi zdravi.

Mnogo sam zaposlen. Sa raznih strana napastuju me da im pišem članke, aktovke, novele. Nedavno je u zagrebačkom "Almanahu" izišla jedna moja novela, koja nije prošla nezapažena. 23. januara o.g. priredila je riječka Čitaonica meni u čast "Književno veče". Htjeli su da čitam neke odlomke iz mojih djela. Odbio sam, jer sam baš u ono vrijeme trpio od "palpitacije..." Jedva sam se dao skloniti, da budem one večeri nazočan čitanju. Čitao je član riječkog kazališta Lovrić, mogu reći, odlično. Vrijeme je bilo rdjavo, ali dvorana prepuna publike. Mnogo pljeska, za moje staro srce i odviše uzbudjenja. Poklonili su mi i lovor-vijenac sa trobojnim trakom. Sve lijepo, ali je za mene najljepše bilo, kad sam sio u auto, koji nas je odveo kući, mene i tetu Emu.

Mi se doma pomalo konsolidujemo, a zapadni gangsteri već se uvlače u svoje brloge. Vide oni svakim danom sve više, da je slavenstvo pretvrda kost za njihove - zlatne zube.

Za danas ovoliko. Mnogo najsrdačnijih pozdrava od svih nas i more najiskrenijih čestitaka! Živ nam bio!

Tvoj barba

Viktor

Tu Viktor Car Emin piše da j' star, a imel je samo 78 let. Još vavek je bil, rekli bi stari judi, ingamba čovek. Drugo leto komać je postal najprej dopisni, a onput i redovni član JAZU.

Jeno drugo pismo pisano je 1961. kad je Viktor Car već imel 90 let. Drhtala je ruka, ma sejeno su za njun ostale jenako teple i srdašne rigi ke je uputil svojmu neputu. Nilo je već bil bolan.

Moj Nilo - dragi i predragi!

Mislimo na tebe, govorimo o tebi, u dušama nam se rađaju vruće želje za tvoj najskoriji oporavak - želje - jedne ljepše i življe od drugih.

- Tako je! - reći ćeš ti i dodati: - Sve je to lijepo, ali pisma iz Opatije stižu sa nemalim zakašnjenjem.

- Tako je na moju žalost! A krivnja je - vjeruj mi, moj Nilo - na događajima, što su me, osobito za posljednjih nekoliko mjeseci, uvelike zaokupili i obasuli me novim obavezama, kojima se još ne mogu da otmem, mada je od onog mog - takozvanog jubileja prošlo već dosta vremena. Trebalo bi - u prvom redu - da mi ti ozdraviš, da se nadjemo zajedno, pa da ti redom sve ispričam, da vidiš, kakav je mučenik ovaj tvoj devedesetgodišnji barba. Taj će dan osvanut - ja u njega vjerujem. Vjerujem u njegov najskoriji dolazak, kao i u sve ono lijepo i milo, što će nam sa sobom donijeti. A - dotle - pazienza! I da mi se dobro držiš ti i tvoji mili: Tvoja dobra Ada s dragom dječicom! Ovoliko u hitnji, ali uvijek s tobom i s tvojima u duhu.

Do skorog ozdravljenja! I do što skorijeg viđenja!

To ti poručujemo teta Ema, ja i Tonica.

Primite od nas svi mnogo naših najljepših pozdrava. Živi nam bili! I vedri i veseli.

Tvoj barba

Viktor

Dve leta potle ovega pisma (17. IV. 1963.) umrl je Viktor Car Emin. Leto za njin i dr. Nilo Car.

Živjenje Viktora Cara, dokle još ni bil Emin, počelo je na prvi dan meseca martinjšćaka. Rodil se - piše va knjigah - 1. XI. 1870. va Kraje.

Kraju je va to vreme pripadalo i selo Sv. Anton. Judi su živeli i gore na brege i dole pul mora. Malo se lagje preživjevalo gore, aš je gore bilo zemji pa j' bilo i konpira i fažola, kapuza i broskav, grozja i vina... Črešnji i marun se prodavalo pa j' va kuću prišal i ki šolad. Judi i danaska reču da j' jenu polovicu familij othranil marun, a drugu črešnje. Po brege su pasle ofce i ka koza, a pod Krajon se i ribi lovilo.

 

        ZA ONEH KI NE ZNAJU KADE J' SVETI ANTON

To je mestićo pet kilometar zgor Mošćeničke Dragi. Ž njega je videt cel Kvarner kot na dlane. Va njega se prihaja s cestun z Mošćeničke Dragi, a more se prit i od Kraja po usken i grden pute. Nekad se samo baš po njin hodilo. Kako se gore živelo, povedala nan Antonija Valentin, jena od trih najstarejeh i danas jedineh živućeh praveh mešćani Sv. Antona: Rojena san 1925. leta. Po prezimene Lazarić. Mama mi j' bila Marija, a tata Andre, ma su mamu zvali Nina Perinova z Visoč, a tatu Kuzma Mušićev. Tako smo mi Mušićevi. Moja je nona imela 14 dece, a nona od mojega muža 13. A moji su imeli samo mane i brata.

Pučka talijanska škola bila je va Kraje. Tu smo hodili tri leta, a potle se šlo va Mošćeničku Dragu. Se hodeć. Semo i tamo. Boje reć zdolun i zgorun po kozjen pute. Ma nas je trejsetak teklo kot nemo pa je vavek bilo veselo.

Doma smo imeli dvajsetak ovac, črešanj, vina i ula, aš je delal toš va Kraje pa nismo živeli loše. A pomogla je i ribarija. Večer smo si sedeli okol ognjišća. Ženske su prele al na žrna mlele frmentu, muški su povedali od dela. Užalo se i zatancat ako j' va kuće bilo malo mesta za tanac.

Po blagdaneh se tancalo i va Dopolavoro na Obrše. Nekad se tancalo i pul Filipoveh, ma to je bilo prej moje mladosti.

Malo je judi delalo aš se sakamo moralo poć hodeć. Za vreme mojeh mladeh dan va sele je bilo čuda mladić i čuda ih je ostalo neoženjeneh. Zmed dva rata va Sv. Antone je bilo samo 26 kuć. Va njih je živelo 150 duš. Va sakoj kuće bilo je po desetak dece. Danaska va teh kućah ni živjenja. Pažići, Markovići broj jedan i dva, Čenjari dva, Jedričići, Perini, Bakotići, Bućičini, Čenjaričini, Škinderići, Juričevi, Devičini, Bartolovi, Meštrovi, Brukvići, Lučići, Marinini, Filipovi i Mušići na broje jedan - posensega su prazne. A se su to bile vele fameji. Sada nigdere nikega. Neke se još rede, neke su posensega propale. Zrušila se i kuća ka j' imela broj 7, a va koj se rodil i Viktor Car Emin... Zvali su ih Perinovi. Neke su kuće kupili judi od ća i va njih pridu samo po lete. Tako pul Mušić i Marceli bivaju Austrijanci, pul Jošketi Mađari, pul Toničini jeni Rečani, va Matejčevoj kuće jena mlaja opatijska fameja s troje dece i oni su po zime tri kvarti sela. I ja san prišla pul hćeri Lovran aš ne moren više bit sama. Gore su još samo dve domaće duši, brat i sestra, Paško i Ana. Si drugi su došlići.

Njija hćer Zorka, rojena 1952. leta, domišja se da su pul te kuće broj 7 bila i dva ozidana dvorića i da su se tri, kuća i dvorići, imeli krov od žlepci. Dečina su okol kuće potekovala i igrala se, a stareji su za potrebu ž njih sako toliko kako je kemu rabilo, zneli i ki žlebac. Tako su ostale samo merine. I zidi su z vremenon krolali, a danaska je se zaraslo va graju. Jedino još stareji znaju kade su bili Perinovi. Zorke je mat povedala da j' prej rata va kuće živel i neki Jožić Perinov. Ča je on bil Viktoru Caru, ne zna, ale da su ga za vreme Drugega rata pobrali va neki nemački logor i da se brižan nikad ni vrnul. Od onda je kuća prazna. Al boje reć, ni je.

Sad beseda dve i od nonota i noni z Sv. Antona. Nono je imel jedrilicu i š njun  pejal morski mel za kuće zidat. Va jenoj nevere ostal je bez brodića, ma j' on hvala Bogu ostal živ, i ni bilo druge leh obrnut se zemje. Imeli su sina jedinca, Viktorovega oca, Antona (1833. - 1916.). I Antona je pijažalo more pa je kot mladić šal navigat. Na brode j' navadil čitat i pisat, a to je va to vreme bilo jako čuda. To mićo zrno znanja, ko j' pobral na brode, pomoglo mu da kašneje boje živeje. Postal je strojar i delal va Port Saidu.

Oženil se za Lovranku, Franjicu Hamza (1842. - 1923.) i zgleda da su prvo vreme živeli pul njigoveh va Sv. Antona. A kad je Anton za ko leto dosta zaslužil, kupili su al storili kuću va Kraje. Danaska je teško sigurno reć ča j' bilo, ale stari judi pamete štorije svojeh starejeh o temu kako se "mići Vitorić" rodil pul nonota. To bi reć va Sv. Antone, ki je pripadal Kraju, a oba skupa su bili del župe Mošćenice.

Sako je mesto imelo svoju crekav, ka do danaska čuva sa otajstva stareh let. Va Crekve Majki Božje i sv. Josipa va Kraje još se čuva i jedanajst zavjetneh slik pomorac ovega kraja, ča govori o teškemu živjenju i mornarskemu kruhu s devet kor. Crekav va Sv. Antone judi su sami popravili.

Storena je i nova cesta od Mošćeničke Dragi zgorun, ma cesta od Kraja do Sv. Antona je početa i nikad finjena. Tako se od zgora hodilo dole va školu i va toš. Vavek i sakamo hodeć. I kaselu z mrtven su nosili tako da su ju zavezali na kolac, kolac stavili na rame dva krepka čoveka i šli zdolun po grden i usken pute. Cel put je dural dve do tri ure na ken ih je kunpanjala angulija s trih zvoniki. Najprej zvon Sv. Antona, pa bi prezel zvon s Kraja, a kad bi sprogod prišal na Pišćetak, oglasil bi se zvon Sv.Bartola z Mošćenic. Tu je bilo grobje za sa ta mesta. Tako su, po užancah onega vremena, va Mošćenicah mir našli Viktorovi nono i nona z Sv. Antona, a morda i mama i tata, ča bi trebalo videt ako je kade zapisano.

Još neš od najranejeh dan ča je i sam Viktor zapisal.

Kad je mali zrasal za školu, otpejala ga mat Franjica svojoj matere va Lovran. To je nona Hamzica, ku Viktor spominje i va svojoj Autobiografije. Pul nje je bil četire leta, od 1876. do 1880. kad je finil četrti razred pučke talijanske školi. Kašneje je zapisal da j' nona vavek imela krunicu v rukah, a v usteh štorije od vili i štrig, a povedal je da j’ njoj s Kraja vavek prnašal od materi orehi i suhe smokvi. Posebe da je volela suhe smokvi. On je tu nonu posebe volel, magar je bila stroga i volela komandirat.

A školu, pak, ni zavolel. Ne zato ča j' bila talijanska, nego zato ča učitel ni jenako gledal decu z grada i decu sela. Puhal je va isti rog kot i lovranski plovan, a to j' značilo da oba drže talijansku stran. Viktor je komać čekal četrtak. Onda ni bilo školi i šal je matere va Kraj. Š njun se pogovaral po domaći, cakavski, kako se onput još govorilo na Lovranšćine. Mat je jako malo govorila talijanski pa j' i dece pretila ovako: Ako ne budeš dobar, će palica rabit! Si me razumel hrvaski?!

I nona Hamzica je bila prava Lovranka. Talijanski ni razumela ni kope ni špade. Za razliku od njih, otac ki j' prihajal familiju videt sake tri leta, preporučil je matere da deca navade talijanski i da ne ostanu cobani. Ma ga nisu poslušale ni jena ni druga.

Na preporuku lovranskega učitela, Viktora su poslali va mađarsku gimnaziju v Reku. Spomeni na tu školu Car je čuda let kašneje ovako opisal: Već prvi dan, što sam ga proveo u onom zavodu osjećao san se neprijatno. Sve hladno, tuđe. I dvorana i namještaj i profesori, a naročito sudrugovi, Fijumanci, neki čudni derani, ni pečeni ni frigani... Imel je samo deset let i molil je mater da ga zipiše s te školi, a ona j' tako i tako mislela poć va Egipat i zet malega sobun pa ga je zipisala. Vrnuli su se doma, va Kraj. Viktor je se više čital romani, vreme j' pasevalo i jedan je dan va Kraj prišal nov mošćenički plovan. Mat ga pozvala doma na kafe i on njoj je svetoval da malega ne zima va Egipat, nego da ga pošaje va Kopar na preparandiju. Kako j' posluh sveta stvar, tako j' Viktor finil va Kopre i postal učitel. Pul domaćega zajika navadil je i hrvaski, talijanski, francuski i ruski. Čital je na seh, a pisal samo na svojen. Puneh sedandeset let.

Rijetki su književnici koji su proslavili sedamdesetogodišnjicu stvaralaštva ne mijenjajući, pritom, bitno svoj književni izraz i ne pokušavajući se prilagoditi suvremenim književnim kretanjima ili podilaziti trenutno modernim književnim interesima. Upravo takav, dosljedan sebi i svom književnom izričaju, bio je Viktor Car Emin (1870. - 1963.), napisala je dr. sc. Ines Srdoč Konestra na samen početke svoje Monografije o Viktoru Caru Eminu, ka je 13. V. 2008. prestavjena v Opatije va Kulturnen dome Zora, kuće ku j' Viktor Car Emin za vreme svojga živjenja v Opatije posebe volel. Na skoro 250 stranic Monografije Ines Srdoč Konestra pospravila je su Carevu pisanu bogatiju, bez onega ča j' pisal za dečinu. Na ten prestavjanjen knjigi Milorad Stojević je s puno štovanja rekal da j' Car bil neobičan književnik koji je s 18 godina napisao svoju prvu pripovijetku, a u 76. godini svoje najbolje djelo Danuncijadu. Mej ten se nasložilo jeno more od 150, morda i više, naslovi ki te jedan dan bit si skupa tiskani. Viktoru Caru Eminu za spomen i hvalu.

Na jenen meste va svojoj Autobiografije Viktor je zapisal i jenu smešicu. Dogodila se kad je još bil mlad, ma i danaska ona ima jenak valor. Piše ovako: Putujući jednom svojom dijecezom upita biskup Dobrila nekog seljačkog dječarca:

- Kako govoriš, mali?

- Hrvatski!

- Dobro! Eto, vidiš! Ti si, dakle - Hrvat!

- Aj vero nisam!

Da je mene pitao, biskup bi, u ono vrijeme, dobio isti odgovor.

Govorit onputa cakavski, al po domaći, ni se računalo da čovek govori hrvaski zajik. Hrvaski je bil zajik školovaneh judi. Al većeh glav. Oneh ki su sedeli va poltronah i komandirali va komune, al su bili učiteli, popi, duhtori... Tako je lovranski principal Jure Cupar javno va ondašnjen općinsken vijeće rekal, a Viktor zapisal: Prisegujen se na Boga, da ja hrvatski ne govorin i ne razumem! Kako ga Bog razumel, ne zna se, ma da je prisegal na praven, staren, hrvasken zajike, vidi se.

Va svojen dugen i bogaten živjenjen Viktor Car Emin čuda je storil za svoj kraj.

Ni bil samo učitel va Sovinjake, va Lipe, na Volosken, nego i upravitelj osnovne školi va Ičićeh, nastavnik opatijske gimnazije i upravitelj Školi za dalju izobrazbu v Opatije, nastavnik ženske gimnazije na Sušake... I se još neš. I ni urejeval samo Narodni list, Mladi Hrvat, Mladi Istranin, Mornar... Pisal je i za Novi list, a Frano Supilo mu bil prijatel. Nekoliko let bil je i tajni i javni tajnik Družbe sv. Ćirila i Metoda za Istru, ka j' širila pismenost mej judi i tako pomogla da se hrvastvo va oveh krajeh ne zatare. Ta pismenost mladeh odvavek je Viktoru ležala na duše pa j' smiron iskal modi kako i kemu pomoć. Pisal je pisma juden od pera doma i po svete. Retko iskal pomoć, raje ju daval. Jeno njigovo pismo bilo je objavjeno i va Merike. Nezavisno glasilo hrvatskog radnog naroda Hrvatski svijet objavio je pismo ko je Viktor Car uputil Antonije i Josipu Vidosichu. Familija Vidosich šla je z Lovrana va Meriku 1922. leta i tamo su proslavili zlatni ženidbeni pir. Viktor njin čestita taj veli god i pismo je va novinah tiskano 9. listopada 1951. Najprej je stavan ovakov naslov: Viktor Car Emin čestita istarskoj porodici u Americi njihov zlatni pir. Zdola naslova piše: Poznati istarski književnik Viktor Car Emin uputio je toplu, prijateljsku čestitku obitelji Vidosich u Palisades Park, N.J. prilikom njihovog zlatnog pira.

A Careva čestitka glasi ovako:

Dragi naši nonići!

Primite prigodom Vašeg zlatnog pira najsrdačnije čestitke našega i vašega rodjenoga kraja i moje. Dugi niz zlatnih godina u krugu Vaših najmilijih, mnogo zdravlja, sreće i zadovoljstva to je što Vam od svega srca želimo svi. Imate za sobom lijepi broj godina ispunjenih radom za Vaše mile, a i ljubavi k našemu narodu. Pred sobom imate svoje uzorno odgojene mladje, koji služe, Vama na diku, a našem milom zavičaju na ponos. Kud ćete ljepše utjehe u odmaklim danima Vašim? Iz ove velike daljine ja Vam, dragi naši, čitam u dušama Vašim i čini mi se da čujem, kako Vam u srcu milo žubore davne uspomene Vaše, one daleke, iz djetinjstva Vašeg, kad ste još mali - a možda i ja s Vama - išli skakajući "na Punte", "na Čistom", oko Peharove i možda od kakve starice slušali davnu lovransku pjesmu - staru, ali tada još živu:

Ključe san zgubila od svete Marije,

Ki bi mi jih našal - bim mu darovala

Facol rakamani - kega j' moja majka

Tri leta rubila - a četrto leto

Zlaton rakamala---

Na suzicah prala - na srcu sušila.

Onda ste otišli u daleki svijet. Naš stari, rodjeni Lovran mijenjao je pomalo lice i dušu svoju, ali Vi ste i u dalekoj zemlji ostali uvijek isti. Vaš je dom i u tudjini ostao komadić daleke, drage, lijepe naše domovine. Hvala Vam od srca! Sretni nam bili! I naši - uvijek naši!                     

Vaš - Viktor Car Emin    

Opatija, 1951.

Pismo je sa leta čuvala hćer Mery Vidosich, oženjena Curač, ka danaska počiva na lovransken grobjen. Reditala ga Branka Sirotnjak i ona ga va jeno vreme dala na čuvanje Radovanu Trinajstiću. On mi ga posudil aš se va njin vidi da j' Viktor Car Emin va svojen srce zavavek ostal pravi Lovranac. Znal je za seh ki su šli po svete i kade ki prebiva. S čuda se njih i dopiševal. Negdere na početke dvajsetega veka uredil je, napisal i tiskal prve lovranske novini za smeh, ke j' nazval Lovranske paćuharije. Ma tiskan je lih jedan broj. Mario Glogović ga imel i on je morda va koj škatule njigove ostavštini, aš ga va Carevoj ni. Za spomen na tu Viktorovu novinu, rojenu va nedobu, današnji Lovranski list objavjuje Nove lovranske paćuharije. Ako niš drugo, bit će spašena jena stara, stara lovranska beseda, paćuharije, ka ni zapisana va nijenen besedare, a znači nepodopštine.

Reču da su čudni puti Gospodnji, ma ni Viktorovi nisu bili lagji. Najprej ga živjenje otpejalo z Lovrana, potle z Opatije, ma kako je bil trdoglave raci, vavek se vrnjal. Lovranci se i danaska štimaju š njin i del njigove ostavštine čuvaju va svojoj biblioteke. Drugi del čuva se v Opatije. A da bi rabil jedan veći muzej, bi. Va sa leta živjenja Viktor se nikad ni šparal ni delu zmaknjeval. Čuda je napisal i čuda nan pustil. Se j' to rasuto po knjigah, novinah i brošurah. Jedan dan kad neki to na kup posloži i tiska, struke će bit lagje reć svojo. A nove te se generacije čudit kako se živjenje promenilo.

Va lepen i grden, aš je bilo sega i sačesa, š njin je sa leta pasala njigova Ema, žena ku je volel više od sebe. Za Emu Jurković oženil se 27. 1. 1897. leta. Imel je 27 let i bil oštajonan mladić kad je h svojmu imenu dodal i njijo. Zavavek. Celo su se živjenje kunpanjali, skupa stareli, lepa leta proživeli i sada skupa počivaju na opatijsken grobjen. Ema je umrla četire leta potle svojga Viktora, 6. XI. 1967.

Kada se v Opatije prestavjala Monografija Ines Srdoč Konestra, na se su se strani  razletale besedi hvali i pohval. Za dušu su mi se nekako posebe trdo takale one ke j' zrekla ravnateljica opatijske Biblioteki Suzana Šturm Kržić: Viktor Car Emin bio je cijeli svoj dugi život odan supruzi. Pa ipak on ima i svoje dvije kćeri. Jedna se zove Biblioteka Viktor Car Emin Opatija, a druga Osnovna škola Viktora Cara Emina Lovran.       

Povratak na kazalo © 2001-2024 Klub Sušačana