SUŠAČKA REVIJA broj 77

 


baština

TRI KNJIGI, TRI PERLI

Cvjetana Miletić

Franjo Matetić, prvi zvonejski pisac

Zvoneće je svojni bilo najdajo selo, ko j' pripadalo kastavskemu komunu. Tako su nebogi judi za saku i najmanju stvar morali poć va Kastav, ki je va to vreme već bil grad. I to grad na vrh brega, 365 metar znad mora, pa se užalo reć da j' Kastav leto dan nad moren. Va njega se šlo molit, krstit, pričestit, bermat, ženit, duhtoru i va školu, va njin se kupjevalo i prodavalo. Va njega se svojni samo hodeć prihajalo. Al z vozon, ki ga j' imel. Samo su se gospoda al duhtori va kalesine al karoce pejali.

Se okolo Kastva je Kastafšćina. Nju je najboje poznal kastafski učitel Ivo Jardas. On je napisal knjigu Kastavština, ku danaska ima skoro saka kuća, a va koj se more pročitat: Kastafšćina se zove vas on kraj, ki j' nekada spadal pod kastafsku pravicu. To će reć pod kastafsku kapitaniju, sučiju i pod kastafski komun ale općinu.

Va to vreme još se govorilo: "Kastafšćina je se pod zvon Svete Jeleni."

To je značilo da se Kastafšćina proteže do seh oneh mesti va keh se čuje zvon z vele crekvi Svete Jeleni Križarice. To bi bilo na stran kade sunce zahaja zad Učku se do Rukavca, Kućel, Zvoneća, Brguda i daje prama Lisine.

Za povedet štoriju od mesta Zvoneće, prvo nan rabi jena knjiga, a onputa i čovek ki ju j' napisal. Knjiga se zove Zvoneća svojni, a čovek je Franjo Matetić. Ma, homo prvo od knjigi. Ona pošne ovako:

Početak druge polovice 19. stoleća...

Jedan lep, ma dosta mrzal dan, šal je sprogod, kako i čuda puti prej, Zvoneće na Kastav. Ni to bila baš lahka stvar, tu j' čoveku dve dobre ure hoda, a noseć mrtvega i tri. Za nosit nosila, keh su zvali kavalet, na keh se j' stavila kasel, rabilo j' šest ljudi i još šest za promenit oneh ki su nosili, a to se j' menjalo saki put kada bi se počinulo.

Na sprogode j' bil i zvonejski župan Tone, po prezimene Kinkela. Čovek blizu pedeset let, već mu j' prilično vlasi falilo, ale po obraze mu se ne bi dalo više od četrdeset. Brki su mu bili gosti, tanko zasukani, obrvi velike, a spod njih su zelenkaste oče tako živo gljedale da njin niš ni moglo zbeć.

Kad je na cimitere plovan finil zmolit mrtorij, pošapće Tonetu na uho da ga malo pred crekvun Svete Lucije počeka... On je tako i storil; va to vreme su se judi rashajali... Valje pride i plovan i reče Tonetu: - Kinkela, znate, drugi ćedan će bit skupšćina, nećete valda falit?

Tone Kinkela je bil župan od sela Zvoneće, danaska bi to bil vijećnik. Kad je drugu šetemanu prišal va Kastav na skupšćinu i prvo se šal javit gospodinu plovanu, čul je najlepju novitad za svoje mesto. Plovan mu je rekal: "Kinkela, mi smo pasani mesec imeli kunšilj v' Reke; bilo nas je preko trejset, a bil je i velečasni biškup. Najviše govora j' bilo za zvonejsku županiju. Vi va vašoj županije imate već preko petsto duš, i broj smiron raste. Kako i sami vidite van je jako potrebna crekav, kade bi jedan kapelan mogal mašu služit i decu kršćanski odgajat. Kako su va vašoj županije, more se reć si nepismeni, bi se kapelana zadužilo da decu vadi čitat i pisat, koliko bi to mogal, a i se druge kršćanske potrebi bi se obavljale na Zvonećoj. Ne bi rabilo prihajat va Kastav, i poć na skupšćinu, pak će i tamo o toj stvare bit govora, a ja ću prit malo kašnjeje..."

Kad je to potvrdila i skupšćina, ni bilo srećnejega čoveka od župana Toneta.

Zvoneće će dobit crekav! Ka sreća! Dogovoreno je da će sa greza dela odbavit judi, a sa artižanska dela je prezela općina i biškupija. I tu se živjenje počelo menjat. Va selo je prišla pismenost, ma se malo al niš zapiševalo. O temu je vremenu danaska teško govorit.

Prva saga na zvonejskoj čakavice

I sada smo prišli do našega čoveka - Franjota Matetića. Njemu niš ni teško. Ni mu bilo teško delat, meltu mešat, zidi zdigat, kuće zidat...

 

    Napomena: Članci iz Sušačke revije u Web izdanje ne prenose se kompletni, sa svim slikama, potpisima pod slike, okvirima, tablicama i sličnim. Za cjelovit uvid u članke pogledate papirnato izdanje. Hvala.

Povratak na kazalo © 2001-2014 Klub Sušačana